Danskit kunngeqarfiannut atajunnaarnissatsinnik ileqqorissaarnikkut, inuttut, inatsisitigut politikkikkullu pisinnaatitaanerput atussallugu kissaatigaarput.

Kissaatigaarput tamatta akisussaaffik tigussagipput tamatumuuna anguniarlugu Kalaallit Nunaat sutigut tamatigut nunatut naqisimaneqanngitsutut tamakkiisumillu killiligaanngitsumik oqartussaatitaasutut isigineqassasoq taamalu iligiinnissamik isumaqatigiissusiorsinnaassalluni, nunanut allanut isumaqatigiissuteqarsinnaallunilu attaveqarsinnaassasoq, niuernikkut politikkikkullu attaveqarsinnaassasoq kiisalu namminerisaminik politikkikkut, kulturikkut inooqatigiinnikullu kinaassuseqarluni peqataasinnaassasoq.

Kissaatigaarput inuit akornanni, minnerunngitsumillu nunarsuup, pinngortitallu inuunillillu tamavimmik akornanni naligiinnerup ataqqeqatigiinnerullu piviusup akisussaaqataaffiginissaanik nunatut takutitsissasugut. Kissaatigaarput takorluukkamik piviusuungitsumik ullumi akornatsinni toqqammavigineqartumik iperaanissatsinnut akisussaaqataanitsinnik takutitsissasugut. Takorluugaq piviunngitsoq taanna naligiinnginnermik, atornerlugaasutut misiginermik, naqisimanninnermik naalliunnermillu pilersitsimavoq. Akisussaaffik taanna takutissinnaanngilarput immitsinnut naalagaaffimmut allamut naalagaaffigisassangortissimagallartilluta. Akisussaaffimmik tamatuminnga tigusinnaanngilagut pingaartumik naalagaaffiup taassuma siunertarippagu takorluugaq piviunngitsoq taanna attatiinnarneqassasoq.

Namminersulernissamut inatsisitigut aqqutissat namminersorneq pillugu inatsimmi 2009-imeersumi tunngavinnut naapertuupput kiisalu suliami tassani Danmark isumaqatiginninniarfigineqarsinnaalluni.

Danmark sivisoorsuarmik attavigisimavarput kissaatigaarpullu namminersornermut ikaarsaarnermi tassani Danmark nunasiaatilittut akisussaaffimmik tigusissasoq. Kissaatigaarput kinguaariit nutaat tamakkiisumik namminersortuullutik peroriartornissaannut peqataassasoq, ingerlaannartumik namminersortunngornissamut tunngavissap ataavartup qularnaarneqarnissaanut Danmark peqataassasoq. Taama ingerlasoqassaaq kinguaariit tulliit kiffaanngissuseqarlutik inerinnissaata tungaanut kiisalu Kalaallit Nunaata Danmarkimut aningaasarsiornikkut qilersorsimajunnaarnissaanik ilusilersueqataasinnaanngornissaasa tungaanut.

Suliap ingerlaqqinnissaanut Danmark peqataajumanngippat Kalaallit Nunaata tamatumunnga peqataasinnaasumik suleqatissarsiornissaminut pisinnaatitaaffeqarnini atussavaa.

Tamanna ilumut ajornanngila? Uani atuaruk.