Nutaarsiassat

2021-05-06

Live-qqingajalerpugut!🤗
Marlunngorpat maajip aqqarngani nal. 19:00 Maatalii Okalik, Pangnirtung Nunavummeersoq pulaartorissavarput.
Maataliip qulleq qanoq ikinneqartarnersoq takutissavaa aammalu ileqqutoqqat, oqaatsit, naleqartitat assigisaallu pingaaruteqarneri pillugit eqqartueqatigiissaagut.
Peqataanissannut Maataliillu aperinissaanut periarfissaqarputit.
Live-rnerput kalaallisut tuluttullu ingerlatissavarput.
Pulaartoqarnissarput qilanaarivarput!

https://www.facebook.com/inuitnutaat

———————————————————
We will be broadcasting live again very soon!
Tuesday May 11th at 7 pm we will have Maatalii Okalik from Pangnirtung Nunavut to come and visit us. 🤗
She will show us how to light a qulleq and we will also be talking about culture, traditions, language, values and the importance of it.
You have the chance to join us and ask Maatalii.
The live broadcast will be in kalaallisut and English.
We are looking forward to next Tuesday!

https://www.facebook.com/inuitnutaat


2021-04-25

Kikkut ineriartortinneqarnissaat uani pineqarpa?

Inuit Nutaat isumaqarput Namminersorlutik Oqartussat suliffeqarfissuillu allat nunaqavissut ineriartortinnissaannut periarfissiinissamut akisussaaqataassasut - sapinngilagut!


2021-04-17

Kulturi, ileqqutoqqat oqaatsigullu tulluusimaarutigut aallutissavagut 🌱🇬🇱

Nittartakkatsinni Facebookitsinnilu malinnaasusi sorlatsinnit aallartittariaqarnerput pillugu allatagut atuareersimassavasi. Inuiaqatigiit naasutut takorloorutsigit taava taama aaqqiiniarnitsinni pilutaat ataasiakkaarlugit kusassarniarsaraavut. Naasulli sorlaa puigorparput. Puigorparput ilaatittariaqaratsigit kinaassuserput, imminut naleqartinnerput kiisalu tarnivut.

Inuit Nutaani isumaqarpugut ingerlariaqqissagutta sorlatsinnit aallartittariaqartugut. Kiffaanngissuseqarnissatsinnut sapiissuseqartariaqarpugut. Namminiussuserput atorsinnaanngortariaqarparput. Taamaattumik aamma pingaaruteqarpoq Kulturi, ileqqutoqqat oqaatsigullu tulluusimaarutigut aallunnissaat.
Sapaatip akunnera 17-imiit pulaartoqarluta kulturi, ileqqutoqqat oqaatsigullu pillugit eqqartueqatigiilluni facebook live ingerlattalissavarput.

Avitseqatiginissarsi qilanaarivarput, ilissi aamma pulaartutsinnut aperinissamut periarfissaqartarumaarpusi.

Marlunngorneq 27/4 nal. 19:00 Anda Poulsen pulaartoriumaarparput, tassani qilaatip uatsinnut isumaa oqaluttuariartorumaarpaa.


2021-04-04
Stacks Image 214
Taasinerit Kalaallit Nunatta namminersulivinnissaanut atoruk!

  • Nammineq nunagisatsinni ikinnerussuteqarpugut. Danmark oqartussaavoq.
  • Ullut tamaasa kinaassuserput kimikilliartorpoq qallunaangorsaanerup aqqani.
  • Oqaatsivut qitiupput, nukittorsaaniarnitsinnili assortorteqaqaagut.
  • Ukiut 300-it kingorna issittumi takoqqusaarutitut atorneqalerpugut nammineq pisinnaatitaaffeqarata.
  • 2021-imi Inatsisartunut qinersineq partiit qinersisunik pissaanermillu taamaallaat pinnanniarfigaat.
  • Taamaammat atugarissaarneq neriorsuutaalluartaqaaq, naalagaaffinngornissarli pineqassanani.
  • Taamaammat sorlavut pinangit qallikkut piit eqqartorneqarput.
  • Eqqaamajulli qinersinerup kingorna pissutsit taamaaginnassammata!

  • Soormi sorlatsinnik aallartinnianngilagut? Massakkut!
  • Soormi Kalaallit naalagaaffiliornianngilagut? Massakkut!
  • Soormi pingaartitavut tunngavigalugit nunarput sanarfinianngilarput? Massakkut!
  • Soormi qitornavut Kalaaliussuserminnik tulluusimaarutiginnitsillugit perorsarnianngilavut? Massakkut!

  • Politikkikkut pitsaaniarnerup aqqani kinaassuserput tammartinnagu namminersulivinnissaq nukinginnarseqaaq.
  • Namminersortuugutta silarsuaq tamaat tulluusimaarluta kiinnerfigissavarput ineriartornermullu suleqateqassalluta.
  • Aningaasarsiorneq, ilinniagaqarneq, atugarissaarneq, illersornissaq, inatsisit tunngaviusut, innuttaassuseq soorunami tamarmik aaqqinneqarsinnaapput.
  • Namminersulivinneq takorluugaanaanngilaq. Pilersaarutaavoq. Iliuusissaavoq pisariaqavissoq.

Taasinerit partiinut massakkut Kalaallit Nunatta namminersortunngornissaanik ammasumik sulissuteqartunut atoruk!

Inuit Nutaat - Sorlaqarfik Anersaarlu Nukittuut - Inuiaqatigiit Peqqissut

2021-03-31
Stacks Image 197
Qinersineq piffissalersuinitsinnut ilaanngilaq. Partiiunngilagut, qinersineqareerpallu ingerlaqqissaagut. Ullulli kingulliit qulit oqaatiginiagarput qinersinissamut saqqummiunniarsimavarput.

Takuarput qineqqusaarneq kinaassuseq nammiussuseqarsinnaanerpullu pinnagu qallikkut atukkanik qineqqusaarfiusoq. Partiillumi ilaata namminiilivinnermik pingaartitsisimaqisup namminiilivinneq ataatsimilluunniit taasimanngilaa.

Stacks Image 200
2021-03-30

Anguniagarput ilungersuutigiuassavarput, qinersereernermullu qilanaarpugut oqallinnerit piviusorsiulissammata.
Massakkut naalagaaffinngornerup pingaassusianik paasitsiniaanerput nangissavarput.

Sapaatit akunnerallu una videonngualiorpugut sooq kingusinaartinnata namminersulertariaqarnitsinnik takutitsumik soorlu isumaqartugut tamanna ajornanngitsoq.

Stacks Image 203
2021-03-28

Sapaatit akunnerat unattaaq nuannaarutigisatsinnik tusagassiortoq Martin Breum naapillugu anguniakkatsinnik nassuiaapparput: Sooq namminiivikkumasugut, sooq massakkuussasoq kiisalu sooq ajornanngissorigipput.

Inuit Nutaanit tamassi poorskisiorluarnissassinni kissaappassi!

Facebook: inuitnutaat
Instagram: #inuitnutaat
www.inuitnutaat.org

Stacks Image 193
2021-03-21

Transparency Greenlandip Kalaallit Nunaannik isumakuloqqajaanerata nunatsinni innuttaasunut nikaginnittutut nipeqalersissinnaavaa.

Transparency Greenland qanittumi saqqummersitamini ”corruption barometer”-imi puigorpaat 2017-imiit nunat 119-it sanilliunneqarsinnaasut.

Pissaanermik atornerluisoqarneranik eqqarsartunut taava
  • Naalakkersuisut (gruppi 2A) nunarsuaq tamakkerlugu nunat 119-it akornanni nr. 27-itut inissisimapput. Imaappoq qaffasinnermi inissisimasut 25%-iata iluani, tamannalu ajunngilluinnartutut taaneqarsinnaavoq.
  • Inatsisartut (gruppi 2B) nunarsuaq tamakkerlugu nunat 119-it akornanni nr. 24-itut inissisimapput. Imaappoq qaffasinnermi inissisimasut 25%-iata iluani aamma inissisimapput, tamannalu ajunngilluinnartutut taaneqarsinnaavoq.
  • Politiit (gruppi 2E) nunarsuaq tamakkerlugu nunat 119-it akornanni nr 24-itut inissisimapput, Imaappoq qaffasinnermi inissisimasut 25%-iata iluani, tamannalu ajunngilluinnartutut aamma taaneqarsinnaavoq.
  • Suliffeqarfinni aqutsisut (gruppi 2I) nunarsuaq tamakkerlugu nunat 119-it akornanni nr 29-itut inissisimapput. Imaappoq qaffasinnermi inissisimasut 25%-iata iluani, ajunngilluinnarlunilu.

Kisitsit taakku pitsanngortinneqarsinnaallutillu pitsanngorsarneqartuartussaapput, kisianni kisitsit Kalaallit Nunaannut kusanarput, tassami tamarmik qaffasinnermi inissisimasut 25%-iata iluani inissisimapput.

Kalaallit Nunaanni politikerinut tatiginninnginneq pillugu qulequtsersuinerni nunatsinni oqartussaaqataaneq nakkarsarlugu eqqartuineq pissutaalluni innuttaasut imminut tatiginerat apparsarneqartarpoq, taamaalillunilu nammineq aalajangiinissamut pisinnaatitaanermik qulalersitseqataasinnaasarluni.

Transparency Greenlandip taamatut inissinnera naammaginanngilaq, oqaatigineqarsinnaavorlu taamatut pissusilersorneq nunasiaatilittut pissusilersorneq naleqqatigingajakkaa.

#stopnykolonismen #inuitnutaat

Paasissutissanik aallerfik:
Transparency Greenland
Transparency International Corruption Barometer

Stacks Image 188
2021-03-19

Naalagaaffiit innuttanut pisussaaffii naapertorlugit inuiattut namminiilivinnissamut pisinnaatitaavugut. Tamanna Namminersorneq pillugu inatsimmi allassimavoq. Pisinnaatitaaffigivarput. Piumasariinnartussaavarput.

Namminiilivinneq isumaqarpoq akisussaaffimmik tigusineq.
Namminiilivinneq isumaqarpoq iliuuseqarneq.
Namminiilivinnerup ataatsimoornerput nukittorsassavaa.
Namminiilivinneq aqqutigalugu piginnittussaassusermik akisussaaffimmillu tigusissaagut, inuiaqatigiinnut pitsaanerpaaq aallaavigalugu iliuuseqarsinnaalerluta.
Namminiilivikkutta aatsaat Kalaallit Nunaata naalagaaffittut pilersinnissaanut pimoorussilluta ataatsimoorfigilissavarput.

Namminiilivinnissap aallaartinneqarnissaata tungaanut pilersitsiniarnerit tamarmik Danmarkip ataani nunasiaataanerup ingerlatiinnarneratut ingerlassapput. Naak-uku Kalaallit Nunaanni politikerit nunatsinni nunasiaataanerup ingerlateqqinneqarneranik unitsitseqataarusuttut?

Sorlaqarfik Anersaarlu Nukittuut - Inuiaqatigiit Peqqissut

Stacks Image 185
2021-03-14
Tallimanngormat Inga Dóra Guðmundsdóttir, Aki-Matilda Høegh-Dam Siumut, Aqqaluaq B. Egede IA aamma Pele Broberg Naleraq suliarput pillugu eqqartueqatigivagut. Qujanaq isumasioqatigiinnitsinnut. Neriuutigaarput piffissami qaninnerusumi partiit sinneri aamma naapeqatigisinnaassallugit.

2021-03-09
https://sermitsiaq.ag/kl/inuit-ataatsimoortut-nutaat-namminersulivinnissaq-oqaluusererusuppaat

2021-03-05


Tusagassiorfinnut nalunaarut

Namminersulernissaq pillugu oqallinnermi tunngavissaq nutaarluinnaq saqqummerpoq


Kalaallit Nunaat namminersortoq qulequtaavoq tamatta ilisimasarput. Amerlanersatta inuiaat taama oqallinnerat ilisimavaat, oqallinnerlu aaqqissugaasumik ingerlasimanngilaq. Kalaallit Nunaanni innuttaasugut qassiiulluta maannamut pisimasumit sukumiinerusumik oqallinnissaq anguniarparput.

Inuiaqatigiit massakkutut aaqqissugaasut ukiuni 300-ini atoreerlugit isumaqarpugut angerlarsimaffippassuarni oqallinnerup ingerlareersup timitalernissaanut piffissanngortoq.

Oqallinneq iliuuseqarnissarlu tapersersorniarlugit 2021-imi marsip ulluisa tallimaanni nittartakkamik saqqummersitsivugut. Namminersortunngornerup ilumut ajornannginnera, tamatumalu pingaaruteqarluinnarnera toqqammavigaarput. Massakkut isummat saqqummersartut illuatungilerumallugit taamaaliorpugut. Takuuk http://www.inuitnutaat.org/

Partiiunngilagut – qinerneqarsinnaanngilagut. Partiilersunngilagut. Kikkulluunniit Kalaallit Nunatta namminersortunngornissaanik kissaateqartut tapersersorpavut. Kalaallillu Nunaata qanoq ittuunissaanik siunnersuuteqarpugut.

Nunarput kiffaanngitsoq iluunngarluta kissaatigaarput, nunarput naqimaneqarata oqaaseqarsinnaaffipput inuiaqatigiinni qanorluunniit inissisimagaluarutta. Inuiaat nipaata ilagaatigut.

Tusagassiortut attaveqarfissaat: info@inuitnutaat.org

http://www.inuitnutaat.org



2021-03-05
aallartissinnaanngorpoq

Inuit Nutaat - kikkuuvugut?

Kalaallit Nunaanni innuttaasugut nunanilu allani najugaqartugut Kalaallit Nunaata namminersortunngornissaanik pingaartitseqalutalu sulissuteqarpugut, inuiaat kiffaanngitsut imminnut akisussaaffigeqqullugit.

Stacks Image 14

Inuit Nutaat
Sorlaqarfik Anersaarlu Nukittuut
Inuiaqatigiit Peqqissut

Attavissat

  • Email: info@inuitnutaat.org
  • Facebook: inuitnutaat
  • Instagram: #inuitnutaat
  • www.inuitnutaat.org

© 2021 Inuit Nutaat email