Siunissami aalajangigassat inuiaat qinikkallu aalajangigassaraat. Namminersortunngoruttali inuiaqatigiit ulluinnarni inuunerat qanoq allanngussasoq takorloorsinnaavarput:

Nuna, kinaassuseq piginnittuussuserlu:

1. Nunatut namminersortuussagut nunarpullu tamakkiisumik akisussaaffigilersimassavarput
2. Tassani akisussaaffiup malitsigisaanik kikkut tamatta nunatta ineriartortinneqarnerani ataatsimuulersinnaavugut
3. Ulloq namminersortunngorfik piviusumik inuiattut nalliuttorsiorfigisassavarput
4. Ilisimaqqissaalersimassavarput kikkut innuttaanersut kikkullu innuttaanginnersut. ”Kikkut kalaaliorpiaanersut kalaaliorpiannginnersullu” oqaluusereqqissanngilarput.
5. Kalaallit Nunaanni innuttaasut qinersinerat tunngavigalugu Kalaallit Nunaannik ineriartortitsineq tamakkiisumik sammineqartalersimassaaq
6. Nunanut allanut, Naalagaaffiit Peqatigiinnut, Issittumi Siunnersuisoqatigiinnut kiisalu nunat tamalaat suliniaqatigiiffiinut allanut namminerisatsinnik peqataatitaqartassaagut.
7. Meeqqat namminersortuullutik kikkuussusertillu ilisimaqqissaarlugu ineriartussapput (aammalu kalaallisut passeqarlutik)
8. Kalaallit timersortartut, ilinniartut, kulturilerisut Kalaallit Nunatsinnit sinniisorisassavavut
9. Danmark piviusumik naligissavarput. Ataqqineqassagutta ilungersortussaavugut, namminerli kiffaanngissuseqarluta ineriartortissinnaassavarput.

Kalaallit Nunaata ineriartortinneqarneranik aallussineq

1. Pisuussutit uumaatsut nammineq pigissavavut isertitallu affaannik Danmark tunisariaqartassanngilarput.
2. Naalagaaffeqatigiinneq qiviaqqajaajuaannarnagu siumut isigisinnaanngussaagut. Ingerlaqqissimassaagut.
3. Politik partiinut tunnganngilaq, kisiannili inunnut nunatsinnullu.
4. Pisortani allaffissorneq uagutsinnut naleqqussarsimassavarput.
5. Innuttaasut inissaqarnissaat, peqqinnissaat, ilinniagaqarnissaat isumaginninnermi pissutsit pitsaasuunissaat nammineq tunngavissiavut malillugit akisussaaffigissavarput.
6. Ilinniartitaaneq ilisimatusarnerlu eqqarsaatigalugit nunat avannarliit nunallu allat toqqaannartumik suleqatigissavavut, tamannalu Kalaallit Nunaanni nalilinnik pilersitsinitsinni iluaqutigissavarput.
7. Atuartitsineq aaqqissorneqarsimassaaq meeqqat inuusuttuaqqallu namminneq oqaatsitik atorlugit nunaminnut akisussaaffeqartussanngorlugit kiisalu nunarsuarmioqatigiit oqaasiinik aappaattut oqaaseqartussanngorlugit (tuluttut)
8. Suliassatut isigisavut suliarineqartussanngorlugit inuiaqatigiinni inuttut ineriartorneq tapersersussavarput taavalu pingaartitavut, inooqatigiinnikkut kulturikkulu ileqquvut tunngavigalugit suliassat tigorusuppavut.
9. Akornatsinni silarsuarmioqataasullu ataatsimoornerput aallutissavarput, naalagaaffeqatigiinneq pinnagu
10. Naalagaaffiunitsinni ukiut 30 siulliit atussavavut ataatsimoortumik tapiissutinik isumalluuteqarunnaarnissatsinnut sulilluta.

Inuiaat qinikkallu isummertussaapput, sorlaqarfinniilli aallartittariaqarpoq: Inuiaat tarningannit, akisussaaffimmik tigusinissamut piumassusermit kiisalu kinaassusermik ilisimaarinninnermit. Tassa kiffaanngissuseqarnermit.

Kalaallit Nunaat namminersortunngorpat ulluinnarni qanoq inuuneqarnissarput takorloorpiuk?